అనంతపురం: హక్కుల సాధన, సమస్యల పరిష్కారానికి ఐక్య పోరాటాలే మార్గమని, అప్పుడే ప్రభుత్వాలు స్పందిస్తాయని సివిల్ సప్లరు హామాలీ యూనియన్ రాష్ట్ర గౌరవాధ్యక్షులు కె.ఉమామహేశ్వరరావు, మాజీ ఎమ్మెల్సీ గేయానంద్ అన్నారు. ఆంధ్రప్రదేశ్ సివిల్ సప్లయ్ హమాలీ యూనియన్ ఐదవ రాష్ట్ర మహాసభ అనంతపురం జిల్లా కేంద్రంలోని గణేనాయక్ భవన్లో మంగళవారం ఘనంగా జరిగింది. సీతారాం ఏచూరి ప్రాంగణంలో సిఐటియు జెండాను ఆవిష్కరించి గౌరవ వందనం సమర్పించారు. అనంతరం ఆ సంఘం రాష్ట్ర అధ్యక్షులు ఆర్.కృష్ణ అధ్యక్షతన ప్రతినిధుల సభ ప్రారంభమైంది. ఈ సభకు ముఖ్య అతిథులుగా గేయానంద్, ఆ సంఘం గౌరవాధ్యక్షులు కె.ఉమామహేశ్వరరావు హాజరయ్యారు. తొలుత అమరులకు సంతాప తీర్మానం ప్రవేశపెట్టగా మహాసభ నివాళులర్పించింది. మూడు సంవత్సరాల్లో సంఘం ఆధ్వర్యంలో హమాలీల పక్షాన చేసిన పోరాటాలు, సాధించిన హక్కులు తదితర అంశాలపై ఆ సంఘం రాష్ట్ర ప్రధాన కార్యదర్శి భాస్కరరావు నివేదిక ప్రవేశపెట్టారు. గేయానంద్, కె.ఉమామహేశ్వరరావు, సిఐటియు రాష్ట్ర ఉపాధ్యక్షులు జి.ఓబులు మాట్లాడుతూ… సివిల్ సప్లరు హమాలీల శ్రమకు తగ్గ వేతనం అందడం లేదన్నారు.
కార్మికులకు కనీస వేతనాలు, ఉద్యోగ భద్రత కల్పించాల్సిన పాలక ప్రభుత్వాలు నిర్లక్ష్యంగా వ్యవహరించడం బాధాకరమన్నారు. కార్మికుల పక్షపాత ప్రభుత్వాలను గెలిపించుకోవాల్సిన ఆవశ్యకత ఎంతైనా ఉందని వివరించారు. కష్టజీవులు, శ్రామికులు, కార్మికుల మధ్య ఐక్యత లేకుండా చీలిక తెచ్చి బానిసత్వంలోకి నెట్టివేసే ధోరణులను ప్రభుత్వాలు అనుసరిస్తున్నాయని విమర్శించారు. కార్మిక లోకం ఐక్యమత్యంగా ఉండి హక్కులు సాధించుకోవాల్సిన అవసరం ఉందని తెలిపారు. పలు సమస్యలపై ఆయా జిల్లాల ప్రతినిధులు చర్చించారు.
రాష్ట్ర అధ్యక్ష, కార్యదర్శులుగా కృష్ణ, ఎస్.ఉదయభాస్కర్రావు
25 మందితో నూతన కమిటీ : 25 మందితో ఆంధ్రప్రదేశ్ సివిల్ సప్లయ్ హమాలీ యూనియన్ రాష్ట్ర నూతన కమిటీ ఎన్నికైంది. రాష్ట్ర గౌరవ అధ్యక్షులుగా కె.ఉమామహేశ్వరరావు, రాష్ట్ర అధ్యక్షులుగా ఆర్.కృష్ణ, ఉపాధ్యక్షులుగా శ్రీనివాసులు, జొన్నలగడ్డ కృష్ణ , శేఖర్ , రమేష్, రాష్ట్ర ప్రధాన కార్యదర్శిగా ఎస్.ఉదయభాస్కర్రావు, రాష్ట్ర కార్యదర్శులుగా రత్నరాజు, బి.రమేష్ , నాగరాజు , శ్యామ్ , రమేష్ , కోశాధికారిగా ఈ.ఆంజనేయులు , కార్యవర్గ సభ్యులుగా శంకర్, ఈశ్వర్, ఎస్.వీర్రాజు, గోపాలరావు, రాజు, శ్రీనివాస్, నరేష్, వెంకటేష్ , దాదాపీరా, ఎం.రాంబాబు, గోపాల్ ఎన్నికయ్యారు.
Comments
Post a Comment