2025 డిసెంబర్ 31 నుండి 2026 జనవరి 4 వరకూ 5 రోజుల పాటు విశాఖపట్టణంలో జరిగే సిఐటియు 18వ ఆలిండియా మహాసభలను జయప్రదం చేయండి!!

సిఐటియు ఆలిండియా మహాసభల సందర్భంగా పోస్టర్ ఆవిష్కరించిన సిఐటియు రాష్ట్ర అధ్యక్షులు ఏ.వి. నాగేశ్వరరావు, ప్రధాన కార్యదర్శి సి. హెచ్. నరసింగరావు, ఉపాధ్యక్షులు వి.ఉమామహేశ్వరరావు, కార్యదర్శులు కె.ధనలక్ష్మి, దయా రమాదేవి, కె. ఉమామహేశ్వరావు, ఆర్.వి.నర్సింహారావు, కోశాధికారి కె. ఆర్.కె.మూర్తి.

సిఐటియు ఆలిండియా 18వ మహాసభలు 2025 డిసెంబర్ 31 నుండి 2026 జనవరి 4 వరకూ 5 రోజుల పాటు విశాఖపట్టణంలోని ఆంధ్రా యూనివర్సిటీ, కన్వెన్షన్ సెంటర్ బీన్రోడ్డులో జరుగుతున్నాయి. ఈ ఆలిండియా మహాసభలకు దేశంలోని అన్ని రాష్ట్రాలు, కేంద్ర పాలిత ప్రాంతాల నుండి ప్రతినిధులు పాల్గొంటారు. వివిధ దేశాల ట్రేడ్ యూనియన్ నాయకులు ఈ మహాసభలో పాల్గొని సౌహార్థ సందేశం ఇస్తారు. సిఐటియు 1970వ సంవత్సరంలో ఏర్పడింది. సిఐటియు ప్రారంభం నుండి చిరుద్యోగుల, కార్మికుల, ఉద్యోగుల, ప్రజల సమస్యల పరిష్కారం కోసం నిరంతరం కృషి చేస్తున్నది. నిరంతరం ఉద్యోగ, కార్మిక వర్గాల కోసం పని చేస్తున్న సిఐటియు మహాసభలు జయప్రదం కోసం రాష్ట్రవ్యాప్తంగా అన్ని జిల్లాల్లో వివిధ రూపాల్లో కార్యక్రమాలు, సాంస్కృతిక కార్యక్రమాలు నిర్వహిస్తున్నాము. జనవరి 4న ర్యాలీ, బహిరంగ సభ జరుగుతుంది. ఈ బహిరంగ సభలో పెద్ద సంఖ్యలో ఉద్యోగులు, కార్మికులు పాల్గొని విజయవంతం చేయాలని ఉద్యోగులకు, కార్మికులకు సిఐటియు రాష్ట్ర కమిటీ పిలుపునిస్తోంది.

గత 11 సంవత్సరాల నుంచి కేంద్రంలోని బీజేపీ మోడీ, రాష్ట్ర ప్రభుత్వాలు పూర్తి ప్రజావ్యతిరేక పాలన చేస్తున్నాయి. బీజేపీ హిందు మతోన్మాదాన్ని రెచ్చగొట్టి ప్రజల్లో చీలిక తెచ్చి పాలన సాగిస్తున్నది. రాజ్యాంగాన్ని ధ్వంసం చేస్తున్నది. పచ్చి కార్మిక వ్యతిరేక విధానాలు అమలు చేస్తున్నది. పెట్టుబడిదారుల దోపిడికి అడ్డంగా ఉన్నాయని కార్మిక సంఘాలు, ప్రతిపక్షాల అభ్యంతరాలు, నిరసనలను పట్టించుకోకుండా 29 కార్మిక చట్టాలు రద్దు చేసి 4 లేబర్ కోడ్లు అమల్లోకి తీసుకొచ్చేందుకు నవంబర్ 21న నోటిఫై చేసి అమలు చేయబోతున్నారు. దేశవ్యాప్తంగా కార్మిక, ఉద్యోగ సంఘాలు వ్యతిరేకిస్తున్న ఈ లేబర్కోడ్స్ను స్వాతంత్య్రానంతరం చేపట్టిన సమగ్ర కార్మిక, ప్రగతిశీల సంస్కరణలుగా ప్రధాన మంత్రి నరేంద్ర మోడీ గారు ఎక్స్లో పోస్ట్ చేయడం హాస్యాస్పదంగా ఉంది. నేడు దేశవ్యాప్తంగా పిల్లలకు, మహిళలకు రక్షణ లేదు. పని ప్రదేశాల్లో మహిళలకు రక్షణ కల్పించకుండా రాత్రిపూట మహిళలు పని చేయాలని లేబర్కోడ్స్లో పెట్టి అమలుకు పూనుకోవడం మహిళల పట్ల ఈ ప్రభుత్వ చిత్తశుద్ధి అర్ధమవుతుంది. పని ప్రదేశాల్లో లైగింక వేధింపుల నిరోధక, నివారణ చట్టం 2013 దేశవ్యాప్తంగా, సక్రమంగా అమలు చేయని ప్రభుత్వం మహిళలు రాత్రిపూట పని చేయాలని చెప్పడం మహిళల పట్ల ఈ ప్రభుత్వానికి ఉన్న చిత్తశుద్ది ఏమిటో అర్థమవుతంది. కార్మికులకు, ఉద్యోగులకు నష్టదాయకమైన లేబర్కోడ్స్కు వ్యతిరేకంగా సిఐటియు అఖిల భారత మహాసభల్లో చర్చించి రాబోయేటువంటి కాలంలో పెద్ద ఎత్తున ఉద్యమాలు, పోరాటాలు చేయడానికి ఈ మహాసభల్లో ప్రణాళికలు రూపొందించబోతున్నాం. బీజేపీ ప్రభుత్వం అధికారంలోకొచ్చాక ఉన్న పెన్షన్ పోయింది. అసంఘటిత కార్మికులకు కనీస వేతనాలు లేవు. పీఎఫ్, ఈఎస్ఐ, బోనస్లు అమలు కావడం లేదు. స్కీమ్ కార్మికులకు జీతాలు పెంచలేదు. బిల్డింగ్, మైనింగ్, బీడీ కార్మికుల సంక్షేమం కోసం సెస్ వసూలు చేసి కార్మికుల సంక్షేమ బోర్డులు నిర్వహించాలి. కాని ఈ సంక్షేమబోర్డుల ద్వారా కార్మికులకు చెల్లించాల్సిన క్లయిమ్స్ను చెల్లించడం లేదు. కాంట్రాక్ట్ కార్మికులకు రక్షణ పూర్తిగా పోయింది. కాంట్రాక్ట్ కార్మికులు జీవిత కాలం పని చేసి ఎటువంటి ప్రయోజనాలు లేకుండా కాంట్రాక్ట్ కార్మికులుగానే రిటైర్ అవుతున్నారు. ప్రజల సంపదలైన విశాఖ స్టీల్ ప్లాంట్తో సహా అన్ని ప్రభుత్వ రంగ పరిశ్రమలను, రైల్వేలను, బ్యాంకులు, ఎలసి, పోస్టల్, డిఫెన్స్, బొగ్గు గనులు, సిమెంట్ తదితర వాటన్నింటినీ ప్రైవేటీకరిస్తూ అదానీ, అంబానీ లాంటి కార్పొరేట్ శక్తులకు అమ్మేస్తున్నారు. భారీ కేంద్ర ప్రభుత్వ రంగ సంస్థ అయిన విశాఖ స్టీల్ ప్లాంట్లో 5 వేల మంది కాంట్రాక్ట్ కార్మికులను ఎటువంటి నోటీసు, నష్టపరిహారం లేకుండా యాజమాన్యం తొలగించింది. ప్రభుత్వ పాలకులే యాజమాన్యాల పక్షాన చేరి పరిశ్రమల్లో ఎటువంటి తనిఖీలు చేయకపోవడంతో తరచు ప్రమాదాల్లో కార్మికుల ప్రాణాలు ఎగిరిపోతున్నాయి. ప్రభుత్వ విధానాల వల్ల నిత్యావసర వస్తువుల ధరలు తీవ్రంగా పెరుగుతున్నాయి. కానీ దీనికనుగుణంగా జీతాలు పెరగడం లేదు. అసమానతలు తారా స్థాయికి పెరిగాయి. ఈ సమస్యలన్నింటి పైన మహాసభల్లో చర్చించి దేశవ్యాప్తంగా ఉద్యోగ, కార్మిక వర్గాన్ని ఐక్యపర్చి ఉద్యమాలు, పోరాటాలు చేయడానికి మహాసభ తీర్మానాలు చేయనుంది.